ຂ່າວດ່ວນ

ລາວ​ ບໍ່່ພົບຜູ້ຕິດເຊື້ອ​ ໂ ຄ ວິ ດ ເພີ່ມ ຂະນະທີ່ຢູ່ໂຮງໝໍຍັງມີຜູ້ຕິດເຊື້ອ 5 ຄົນສືບຕໍ່ປິ່ນປົວ.​

ຄະນະສະເພາະກິດຖະແຫຼງ ວັນທີ 8 ມີນາ ເກັບຕົວຢ່າງມາກວດຫາເຊື້ອໂຄວິດ-19 ທັງໝົດ 300ກວ່າຕົວຢ່າງ, ເຊິ່ງຜົນກວດແມ່ນບໍ່ພົບເຊື້ອ, ທັ້ງນີ້ ສໍາລັບຜູ້ຕິດເຊື້ອເກົ່າທັງ 5ຄົນ ແມ່ນຍັງສືບຕໍ່ນອນປິ່ນປົວຢູ່ໂຮງໝໍ, ເຊິ່ງທຸກຄົນແມ່ນມີສຸຂະພາບຮ່າງກາຍ ຈິດໃຈສົມບູນ ແລະ ແຂງແຮງດີ.

ວັນທີ 9 ມີນາ 2021 ທີ່ກະຊວງສາທາລະນະສຸກ ທ່ານ ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຖະແຫຼງໃຫ້ຮູ້ວ່າ: ປັດຈຸບັນ ທົ່ວໂລກມີການລາຍງານການລະບາດຂອງພະຍາດ ໂຄວິດ-19 ທັງໝົດ 219 (ປະເທດ/ເຂດ), ຜູ້ຕິດເຊື້ອສະສົມ 117.723.527 ຄົນ, ເສຍຊິວິດສະສົມ 2.611.129 ຄົນ ແລະ ປີ່ນປົວຫາຍດີ 93.362.684 ຄົນ.

ສໍາລັບການເຝົ້າລະວັງພະຍາດໂຄວິດ-19 ຢູ່ ສປປ ລາວ ໃນວັນທີ 8 ມີນາ ທົ່ວປະເທດມີຜູ້ເດີນທາງເຂົ້າມາ ມີທັງໝົດ 2.437 ຄົນ ເຊິ່ງທຸກຄົນທີ່ເຂົ້າມາທາງຈຸດຜ່ານແດນ ໃນມື້ວານນີ້ ແມ່ນໄດ້ຜ່ານການວັດແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້, ໄດ້ເກັບຕົວຢ່າງທຸກໆຄົນມາກວດ ເຊິ່ງທັງໝົດແມ່ນບໍ່ພົບຜູ້ຕິດເຊື້ອ ໂຄວິດ-19.

ດ້ານການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 8 ມີນາ 2021 ໄດ້ເກັບຕົວຢ່າງມາກວດວິເຄາະທັງໝົດ 331 ຄົນ; ຜົນກວດວິເຄາະທັງໝົດ ແມ່ນບໍ່ພົບເຊື້ອ ໝາຍຄວາມວ່າ ວັນທີ 8 ມີນາ 2021 ບໍ່ພົບຜູ້ຕິດເຊື້ອໃໝ່;

ສັງລວມການກວດວິເຄາະ ນັບແຕ່ເດືອນມັງກອນ 2020 ຮອດປັດຈຸບັນ ໄດ້ເກັບຕົວຢ່າງມາກວດທັງໝົດ 119.288 ຕົວຢ່າງ, ກວດພົບເຊື້ອສະສົມ 47 ຄົນ. ສໍາລັບການຕິດຕາມປີ່ນປົວຄົນເຈັບຢູ່ໂຮງໝໍ ມາຮອດປັດຈຸບັນ ຜູ້ຕິດເຊື້ອພະຍາດ ໂຄວິດ-19 ຍັງນອນຕິດຕາມປິ່ນປົວຢູ່ໂຮງໝໍຈຳນວນ 5 ຄົນ, ທັງ 5 ຄົນ ທີ່ຕິດຕາມປິ່ນປົວ ແມ່ນມີສຸຂະພາບຮ່າງກາຍ ຈິດໃຈສົມບູນ ແລະ ແຂງແຮງດີ.

ໂອກາດດຽວກັນ ທ່ານ ຮອງຫົວໜ້າກົມຄວບຄຸມພະຍາດຕິດຕໍ່ ຍັງກ່າວໃຫ້ຂໍ້ແນະນໍາຕື່ມວ່າ:ສຳລັບຜູ້ທີ່ຈະເດີນທາງເຂົ້າມາ ສປປ ລາວ ຕ້ອງໄດ້ປະຕິບັດ ອີງຕາມຄຳແນະນຳຂອງຄະນະສະເພາະກິດວາງອອກ, ສະບັບເລກທີ 3087/ສພກ, ລົງວັນທີ 26 ກຸມພາ 2021 ແລະ

ແຈ້ງການ ກ່ຽວກັບການນຳໃຊ້ເຄື່ອງຕິດຕາມທາງການແພດ ແລະ ປະກັນໄພ ໂຄວິດ-19 ສຳລັບຄົນຕ່າງປະເທດ ທີ່ເດີນທາງເຂົ້າມາ ສປປ ລາວ, ສະບັບເລກທີ 3018/ສພກ, ລົງວັນທີ 02 ມີນາ 2021 ພ້ອມດຽວກັນນັ້ນ ທຸກຄົນຕ້ອງໄດ້ຈຳກັດບໍລິເວນຄົບຕາມກຳນົດ ຈື່ງສາມາດອອກໄປເຄື່ອນໄຫວໃນສັງຄົມຕາມປົກກະຕິໄດ້.

ທັ້ງນີ້, ກໍ່ຂໍການຮ່ວມມື ມາຍັງພໍ່ແມ່ປະຊາຊົນ ແລະ ທຸກພາກສ່ວນ ມີຄວາມສາມັກຄີເປັນຈິດນື່ງໃຈດຽວ ຮ່ວມແຮງຮ່ວມໃຈກັນ ປະຕິບັດມາດຕະການຕາມຄຳແນະນຳ ຂອງຄະນະສະເພາະກິດວາງອອກ ຢ່າງຖືກຕ້ອງ ແລະ ເຂັ້ມງວດ ເພື່ອຮັບປະກັນບໍ່ໃຫ້ມີຄວາມສ່ຽງ ທີ່ຈະມີການນຳພະຍາດ ໂຄວີດ-19 ເຂົ້າມາແຜ່ລະບາດໃນປະເທດເຮົາຮອບໃໝ່,

ຖ້າຫາກທ່ານ ພົບເຫັນ ຜູ້ທີ່ຖືກຈຳກັດບໍລິເວນ ລັກລອບອອກຈາກສະຖານທີ່ຈຳກັດບໍລິເວນທີ່ຄະນະສະເພາະກິດກຳນົດໄວ້ນັ້ນ ຂໍຄວາມຮ່ວມມືນຳບັນດາທ່ານ ລາຍງານແກ່ເຈົ້າໜ້າທີ່ກ່ຽວຂ້ອງ ຫຼື ອຳນາດການປົກຄອງທ້ອງຖິ່ນທັນທີ ເພື່ອເຈົ້າໜ້າທີ່ ຈະນຳຜູ້ລັກລອບກັບຄືນມາສືບຕໍ່ຈຳກັດບໍລິເວນ ໃຫ້ຄົບກຳນົດ 14 ວັນ ແລະ ເຝົ້າລະວັງຕິດຕາມອາການຂອງພວກກ່ຽວ ເພື່ອຮັບປະກັນ ບໍ່ໃຫ້ມີການແຜ່ເຊື້ອໄປສູ່ສັງຄົມ ແລະ ຄົນອ້ອມຂ້າງ.

ພ້ອມນີ້ກໍ່ຂໍໃຫ້ບັນດາພໍ່ແມ່, ພີ່ນ້ອງ, ປະຊາຊົນບັນດາເຜົ່າ ຈົ່ງໄດ້ພ້ອມໃຈກັນຍົກສູງສະຕິ ຄວາມຮັບຜິດຊອບໃນການຈັດຕັ້ງປະຕິບັດ ມາດຕະການປ້ອງກັນການຕິດເຊື້ອໃນສັງຄົມ ຢ່າງເຄັ່ງຄັດ ເປັນຕົ້ນ ແມ່ນ: ການໃສ່ຜ້າອັດ ປາກ-ດັງ ໃນເວລາອອກໄປນອກບ້ານ, ລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວລ້າງມື ຫຼື ເຫຼົ້າ70, ຮັກສາໄລຍະຫ່າງໃນສັງຄົມ ຢ່າງໜ້ອຍໄລຍະ 1 ແມັດຂຶ້ນໄປ, ຖ້າບໍ່ຈຳເປັນ ແມ່ນຫຼີກລ້ຽງການໄປຢູ່ໃນສະຖານທີ່ມີຄົນແອອັດຫຼາຍ.

ກ່ຽວກັບ admin

ກວດສອບຍັງ

ແຊຣ໌ບອກຕໍ່ ມາຮູ້ຈັກພະຍາດໂຄວິດສາຍພັນອັງກິດກັນເທາະ

ຂໍ້ມູນຈາກໂຮງຫມໍຈຸລາໆ(ປະເທດໄທ) *ການລະບາດຂອງພະຍາດໂຄວິດ-19ໃນປະເທດໄທໃນຂະນະນີ້ແມ່ນສາຍພັນ B.1.1.7 ຫລື British variant. (ມີການກວດ genome ຢືນຢັນແລ້ວ) ການລະບາດຈະຮຸນແຮງຂຶ້ນ 30 ເຖິງ 50 % ທຸກຄົນຄວນລະວັງຕົວໃຫ້ເຕັມທີ່ສັນຍານ …

Leave a Reply

Your email address will not be published. Required fields are marked *