Breaking News

ປູກຢາງພາລາ ພາຫຼາຍຄອບຄົວພົ້ນທຸກ

ການປູກຢາງພາລາຢູ່ແຂວງ ບໍລິຄຳໄຊ ມີເນື້ອທີ່ 16 ພັນ ກວ່າເຮັກຕາ, ສາມາດສ້າງອາຊີບໃຫ້ຫຼາຍຄອບຄົວທີ່ມາຮັບຈ້າງປາດເອົານໍ້າຢາງ, ອະນາໄມສວນ ແລະ ຍັງສ້າງລາຍຮັບຈາກການເກັບຄ່າພັນທະຕ່າງໆໃຫ້ລັດໄດ້ 700 – 800 ລ້ານກວ່າກີບຕໍ່ປີ.

ສະຫາຍ ພັດທະຈອນ ແກ້ວພຸດທະວົງ ຫົວໜ້າພະແນກກະສິກຳ ແລະ ປ່າໄມ້ ແຂວງບໍລິຄຳໄຊ ລາຍງານຕໍ່ກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ທີ່ຈັດຂຶ້ນເມື່ອບໍ່ດົນຜ່ານມາວ່າ: ຂະແໜງກະສິກຳມີພາລະບົດບາດສຳຄັນຫຼາຍຕໍ່ການແກ້ໄຂຄວາມທຸກຍາກ ແລະ ການພັດທະນາເສດຖະກິດຂອງແຂວງ, ໂຄງປະກອບເສດຖະກິດຂອງແຂວງບໍລິຄຳໄຊ ຂະແໜງກະສິກຳ ກວມເອົາ 26% ຂອງລວມຍອດຜະລິດຕະພັນພາຍໃນ, ການຈັດເກັບລາຍຮັບງົບປະມານໄດ້ຕາມແຜນໃນແຕ່ລະປີໄດ້ສຸມໃສ່ຊຸກຍູ້, ສົ່ງເສີມການຜະລິດກະສິກໍາ ເປັນຕົ້ນແມ່ນການປູກຝັງ, ການລ້ຽງສັດ, ໄມ້ອຸດສາຫະກໍາ ເພື່ອຄໍ້າປະກັນສະບຽງອາຫານ ແລະ ຜະລິດເປັນສິນຄ້າ ສາມາດສ້າງລາຍຮັບໄດ້ 1.600 ຕື້ກວ່າກີບຕໍ່ປີ, ສິ່ງພົ້ນເດັ່ນແມ່ນການປູກຢາງພາລາ.

ປັດຈຸບັນທົ່ວແຂວງມີເນື້ອ ທີ່ປູກຢາງພາລາ ທັງໝົດ 16.930 ເຮັກຕາ, ປາດເອົານໍ້າຢາງໄດ້ແລ້ວ 10.731 ເຮັກຕາ, ຜົນຜະລິດເປັນຢາງກ້ອນ 53.655 ໂຕນ, ລາຄາສະເລ່ຍ 6.000 ກີບຕໍ່ກິໂລ ລວມມູນຄ່າທັງໝົດ 322 ຕື້ກວ່າກີບຕໍ່ປີ. ໃນນີ້, ມີການປູກແບບຄອບຄົວ 5.075 ຄອບຄົວ, ເນື້ອທີ່ 10.191 ເຮັກຕາ, ແບບສັນຍາຮ່ວມຂອງປະຊາຊົນກັບບໍລິສັດ 2+3 ມີ 2 ໂຄງການ ເນື້ອທີ່ 1.207 ເຮັກຕາ ແລະ ສໍາປະທານມີ 21 ໂຄງການ ເນື້ອທີ່ປູກ 5.532 ເຮັກຕາ.

ສະຫາຍ ພັດທະຈອນ ແກ້ວພຸດທະວົງ ໃຫ້ຮູ້ຕື່ມວ່າ: ການ ຊື້ – ຂາຍໄດ້ຈັດຕັ້ງເປັນກຸ່ມເກັບຊື້ 11 ຈຸດ, ມີລານຂາຍ 22 ລານ, ສົ່ງຂາຍໃຫ້ໂຮງງານຜະລິດຢາງກ້ອນ 7 ແຫ່ງ ແລະ ຈໍານວນໜຶ່ງກໍສົ່ງເປັນຢາງກ້ອນອອກຕ່າງປະເທດ, ລາຄາຢາງ 5 – 6 ລ້ານກີບຕໍ່ໂຕນ, ສາມາດສ້າງລາຍຮັບໃຫ້ແກ່ເຈົ້າຂອງສວນ ຫຼື ຜູ້ລົງທຶນ ປະມານ 30 ລ້ານກີບຕໍ່ເຮັກຕາຕໍ່ປີ ເຊິ່ງໄລຍະການສ້າງລາຍຮັບຂອງການປູກຢາງພາລາ ເລີ່ມແຕ່ຕົ້ນຢາງພາລາ ອາຍຸ 7 ປີ ຫາ 32 ປີ ເມື່ອໝົດອາຍຸການປາດເອົານໍ້າຢາງແລ້ວຍັງສາມາດຂາຍຕົ້ນຢາງພາລາເປັນສິນຄ້າໃຫ້ແກ່ໂຮງງານປຸງແຕ່ງໄມ້ຜະລິດເປັນເຄື່ອງເຟີນີເຈີ, ຫີບຫໍ່ບັນຈຸສິນຄ້າໄດ້ອີກ ຂາຍໄດ້ 12 ລ້ານກີບຕໍ່ໜຶ່ງໄລ່.

ນອກຈາກການປູກຢາງພາລາສ້າງລາຍຮັບໃຫ້ຜູ້ປູກ ແລະ ຜູ້ລົງທຶນແລ້ວ ຍັງສາມາດສ້າງອາຊີບໃຫ້ຫຼາຍຄອບຄົວທີ່ມາຮັບຈ້າງປາດເອົານໍ້າຢາງ, ອະນາໄມສວນ 500.000 – 1.000.000 ກີບຕໍ່ເຮັກຕາຕໍ່ເດືອນ, ຄ່າແຮງງານຮັບຈ້າງປາດນໍ້າຢາງ ແບ່ງຜົນປະໂຫຍດກັບເຈົ້າຂອງສວນ 40/60, ບາງສວນກໍແມ່ນ 50/50 ຈາກການຂາຍຢາງ, ລາຍຮັບສະເລ່ຍ 13 – 15 ລ້ານກີບຕໍ່ເຮັກຕາຕໍ່ປີ. ພ້ອມດຽວກັນນີ້, ຢາງພາລາຍັງສ້າງລາຍຮັບໃຫ້ພາກລັດ ຈາກການເກັບຄ່າພັນທະຕ່າງໆສະເລ່ຍເປັນເງິນ 700 – 800 ລ້ານກວ່າກີບຕໍ່ປີ.

About admin

Check Also

ຂ່າວດີມາແລ້ວ ແຈກເດິ້ ມື້ນີ້ ວັນທີ່ 7 ພຶດສະພາ 2021

ຄອບຄົວໃຈດີ ກະກຽມຈະມາແຈກຂອງກີນ, ອາຫານ ແລະ ເຄື່ອງແຫ້ງຕ່າງໆ ໃຫ້ຜູ້ຂາດເຂີນ ແລະ ນ້ອງໆນັກສືກສາທີ່ຕົກຄ້າງບໍ່ໄດ້ໄດ້ກັບບ້ານ ໃນມື້ວັນທີ່ 7 ພຶດສະພາ 2021 ທີ່ຫໍພັກ ຊີເກມ ດົງໂດກ. …

Leave a Reply

Your email address will not be published. Required fields are marked *