💮💮ຫົວພັນ ກຽມເປີດເທດສະການ ທ່ຽວຊົມດອກຄາຍປ່າ ສຳພັດອາກາດໜາວເຢັນ 11-12 ມັງກອນນີ້.​

ດອກຄາຍປ່າ ຖືເປັນສີສັນໃໝ່ຂອງການທ່ອງທ່ຽວພາຍໃນແຂວງຫົວພັນ ໃນໄລຍະນີ້, ເຊິ່ງໃນທ້າຍອາທິດຜ່ານມາ, ມວນຊົນພາຍໃນແຂວງ ແລະ ແຂວງອ້ອມຂ້າງ ໄດ້ໃຫ້ຄວາມສົນໃຈມາທ່ຽວຊົມ ແລະ ຖ່າຍຮູບຊົມຄວາມງົດງາມຂອງດອກໄມ້ເມືອງໜາວ ເຊິ່ງຂະແໜງທ່ອງທ່ຽວ ພະແນກ ຖວທ ແຂວງຫົວພັນກໍໃຫ້ຄວາມສຳຄັນຕໍ່ບັນຫານີ້.

ທ່ານ ນາງ ກ່ອງມະນີລາ ບົວທາວົງ ຮອງຫົວໜ້າຂະແໜງທ່ອງທ່ຽວ ພະແນກຖະແຫຼງຂ່າວ,​ ວັດຖະນາທຳ ແລະ ທ່ອງທ່ຽວ (ຖວທ)​ ແຂວງຫົວພັນໃຫ້ຮູ້ວ່າ: ເພື່ອຕອບສະໜອງຄວາມຮຽກຮ້ອງຕ້ອງການທີ່ພວມເປັນກະແສຂອງສັງຄົມ ໃນການທ່ຽວຊົມດອກຄາຍປ່າໃນ ໄລຍະ 3 ປີຜ່ານມາ ໂດຍໄດ້ຮັບທິດຊີ້ນຳຈາກການນຳແຂວງ, ປີນີ້ແຂວງຫົວພັນຈະຈັດ ເທສະການທ່ຽວຊົມດອກຄາຍບານ ຢູ່ເທສະບານເມືອງຊຳເໜືອ ໃນວັນທີ 11-12 ມັງກອນ 2020 ນີ້, ເຊິ່ງກິດຈະກຳພາຍໃນງານປະກອບມີ: ການປະກວດນາງສາວງາມດອກຄາຍ, ທ່ຽວຊົມດອກຄາຍປ່າຢູ່ເມືອງຊຳເໜືອ, ທ່ຽວຊົມສວນຊາກຸຣະຢູ່ເມືອງວຽງໄຊ ແລະ ກິດຈະກຳອື່ນໆ ເຊິ່ງຂະແໜງການທ່ອງທ່ຽວໄດ້ຈັດສັນສະຖານທີ່ຮອງຮັບເອົາໄວ້ແລ້ວ ໂດຍເລືອກເຟັ້ນເອົາບ່ອນທີ່ມີດອກຄາຍປ່າເບັ່ງບານຫລາຍຕົ້ນ ແລະ ງົດງາມທີ່ສຸດເປັນຈຸສູນລວມ ເປັນຕົ້ນ ຢູ່ຈຸດບ້ານຫ້ວຍອວງ ຫ່າງຈາກເທສະບານເມືອງຊຳເໜືອ ປະມານ 8 ກິໂລແມັດ ເປັນຈຸດທີ່ນັກທ່ອງທ່ຽວໃຫ້ຄວາມສົນໃຈ ແລະ ນິຍົມມາທ່ຽວຊົມ ເພາະເປັນຈຸດທີ່ມີດອກຄາຍປ່າເບີກບານຫລາຍຕົ້ນລຽນກັນ ແລະ ມີມູມຖ່າຍຮູບທີ່ງົດງາມ. ສະນັ້ນ, ຂະແໜງການທ່ອງທ່ຽວ ຈຶ່ງໄດ້ບູລະນະດ້ວຍການສ້າງບັນດາກິດຈະກຳປິ່ນອ້ອມ ເປັນຕົ້ນ ສ້າງຈຸດຖ່າຍຮູບ ແລະ ສ້າງສິ່ງອຳນວຍຄວາມສະດວກຕ່າງໆ ເພື່ອຮອງຮັບນັກທ່ອງທ່ຽວມາທ່ຽວຊົມ.

ທ່ານ ນາງ ກ່ອງມະນີລາ ບົວທາວົງ ຍັງໃຫ້ຮູ້ອີກວ່າ: ນອກຈາກທ່ຽວຊົມດອກຄາຍປ່າທີ່ເປັນຈຸດເດັ່ນແລ້ວ ພາຍໃນແຂວງຫົວພັນ ຍັງມີແຫລ່ງທ່ອງທ່ຽວທຳມະຊາດ, ວັດທະນະທຳ ແລະ ປະຫວັດ ສາດຫລາຍຈຸດທີ່ເໝາະສົມໃນການທ່ຽວຊົມໃນຊ່ວງລະດູໜາວນີ້ ເປັນຕົ້ນ ແຫລງທ່ອງທ່ຽວປະຫວັດສາດ-ທຳມະຊາດພູຜາຖີ່, ເຂດປະຫວັດສາດເມືອງວຽງໄຊ, ສວນຊາກຸຣະມິດຕະພາບ ລາວ-ຍີປຸ່ນ ທີ່ເມືອງວຽງໄຊ ແລະ ບ່ອນອື່ນໆຕື່ມອີກ.