ຂ່າວດ່ວນ

ແມ່ຍິງຄົນອັງກິດໃຈສະຫລາຍເຫັນແມ່ທີ່ນອນປິ່ນປົວຢູ່ຕຽງຂ້າງໆຕາຍໄປຕໍ່ໜ້າ

​ແມ່ຍິງ​ຊາວ​ອັງກິດ​ທີ່​ເຫັນ​ແມ່ສິ້ນ​ໃຈ​ລົງ​ຕໍ່ໜ້າ ຂະນະ​ປິ່ນປົວ​ພະຍາດ​ໂຄ​ວິດ-19 ຢູ່​ໂຮງໝໍ, ຮຽກຮ້ອງ​ໃຫ້​ທຸກ​ຄົນ​ປະຕິບັດ​ຕາມ​ມາດ​ຕະການ​ປ້ອງ​ກັນ ​ແລະ ​ເຝົ້າລະວັງ​ພະຍາດ​ໂຄ​ວິດ-19.

ນາງ ມາ​ເຣຍ ຣິ​ໂກ ອາຍຸ 76 ປີ ຈາກ​​ລັດ​ເລ​ສ​ເຕີ​ເຊຍ ຖອດ​ໜ້າ​ກາກ​ອົກ​ຊີ​ອອກ ​ເພື່ອ​ໂອ້​ລົມ​ກັບ​ລູກ​ສາວ 2 ຄົນ​ເປັນຄັ້ງສຸດ​ທ້າຍ ​ເຖິງ​ຈະ​ຮູ້​ດີ​ວ່າ​ມັນ​ຈະ​ເຮັດ​ໃຫ້ນາງ​ໄປ​ສູ່​ຄວາມ​ຕາຍ​ໄວ​ຂຶ້ນ.

ນາງ ​ແອ​ນາ​ເບ​ລ ຊາ​ມາ ບອກ​ວ່າ​ຕອນ​ນັ້ນລາວ​ຮູ້ສຶກ “ຫົວ​ໃຈ​ສະຫລາຍ” ​ແຕ່​ຍັງ​ຮູ້ສຶກ​ດີ​ທີ່​ແມ່​ບໍ່​ໄດ້​ເສຍ​ຊີວິດ​ຢ່າງ​ດຽວ​ດາຍ, ພ້ອມ​ເປີດ​ເຜີຍ​ຮູບ​ພາບ​ທີ່​ບອກ​ເລົ່າ​ເຫດການ​ນີ້ ​ເພື່ອ​ໃຫ້​ທຸກ​ຄົນ​ໄດ້​ເນັ້ນໜັກ​ເຖິງ​ອັນຕະລາຍ​ຂອງ​ເຊື້ອ​ໄວຣັສ​ໂຄ​ໂຣນາສາ​ຍພັນ​ໃໝ່.

ນາງ ຊາ​ມາ ​ເລົ່າ​ວ່າ: ​ແມ່​ຂອງ​ລາວ​ສິ້ນ​ໃຈ​ລົງ ຫລັງ​ຈາກ​ຖອດ​ໜ້າ​ກາກ​ອົກ​ຊີ​ອອກ​​ໄດ້​ປະມານ​ເຄິ່ງຊົ່ວ​ໂມງ.

“​ແມ່​ຂໍ​ໃຫ້​ທ່ານໝໍ​ຖອດ​ໜ້າ​ກາກ​ອົກ​ຊີ​ອອກ ​ແລະ ທ່ານໝໍ​ບອກ​ວ່າ: ​ເມື່ອ​ເຈົ້າຖອດ​ມັນ​ອອກ ​ເຈົ້າຈະ​ເຫລືອ​ເວລາ​ອີກ​ບໍ່​ດົນ”.

“​ແມ່​ເວົ້າວ່າ: ຂ້ອຍ​ຮູ້ ​ແຕ່​ຂ້ອຍ​ທົນ​ມາ​ພໍ​ແລ້ວ”. ລູກ​ສາວ​ອາຍຸ 49 ປີ​ເລົ່າ.

“​ແມ່ບອກ​ວ່າ​ແມ່​ບໍ່​ຢ້ານ​ຕາຍ ​ແມ່​ພ້ອມ​ແລ້ວ ​ແມ່​ບອກ​ຂ້ອຍ​ວ່າ​ຂ້ອຍ​ຕ້ອງ​ສູ້​ໃຫ້​ເຖິງ​ທີ່​ສຸດ ​ເພາະ​ຂ້ອຍ​ຍັງ​ມີ​ລູກໆ​ຢູ່​ເຮືອນ” ນາງ ຊາ​ມາ ​ເລົ່າ.

​ໃນ​ຕອນ​ນັ້ນ, ນາງ ຊູ​ຊາ​ນາ ນ້ອງ​ສາວ​ຂອງ​ນາງ ຊາ​ມາ ​ໄດ້​ຮັບ​ອະນຸຍາດ​ໃຫ້​ເຂົ້າ​ໄປ​ຫາ​ແມ່​ນຳ ​ໂດຍ​ໃສ່​ຊຸດ ​ແລະ ອຸປະກອນ​ປ້ອງ​ກັນ​ການ​ຕິດ​ເຊື້ອ PPE.

“ຂ້ອຍຈັບ​ມື​ແມ່​ໄວ້​ຈົນ​ລົມ​ຫາຍ​ໃຈ​ສຸດ​ທ້າຍ​ຂອງ​ທ່ານ” ນາງ ຊູ​ຊາ​ນາ ​ເລົ່າ.

“ມັນ​ເຮັດ​ໃຫ້​ຂ້ອຍ​ຮູ້ສຶກ​ສະບາຍ​ໃຈ​ທີ່​ໄດ້​ຢູ່​ກັບ​ແມ່ (​ໃນ​ວາລະ​ສຸດ​ທ້າຍ) ​ແລະ ຂ້ອຍ​ຮູ້​ວ່າ​ມັນ​ເຮັດ​ໃຫ້​ແມ່​ໄປ​ສະບາຍ​ເຊັ່ນ​ກັນ”.

ນາງ ຣິ​ໂກ ອາ​ໄສ​ຢູ່​ເຮືອນ​ຫລັງດຽວ​ກັບ​ນາງ ຊາ​ມາ ​ແລະ ຄອບຄົວ​ຂອງ​ນາງ ​ເຊິ່ງປະກອບ​ມີ​ຜົວ ​ແລະ ລູກ​ຊາຍ 3 ຄົນຄື: ທ້າວ ​ໂນ​ອາ ອາຍຸ 10 ປີ, ທ້າວ ​ໄອ​ແຊກ ອາຍຸ 12 ປີ ​ແລະ ທ້າວ ​ເຈ​ຄອບ ອາຍຸ 22 ປີ.

ນາງ ຊາ​ມາ ​ເຊື່ອ​ວ່າ​ລູກ​ຊາຍ​ຄົນ​ໜຶ່ງ​ຂອງ​ນາງ​ຕິດ​ເຊື້ອ​ໄວຣັສ​ໂຄ​ໂຣນາສາ​ຍພັນ​ໃໝ່​ຢູ່​ໂຮງຮຽນ ​ແລ້ວ​ແຜ່​ເຊື້ອສູ່​ຄົນ​ໃນ​ຄອບຄົວ​ຢ່າງ​ວ່ອງ​ໄວ​ຈົນ “​ເປັນຕາ​ຢ້ານ”.

“ຂ້ອຍ​ຢາກ​ຮ້ອງ​ຂໍ​ໃຫ້​ທຸກ​ຄົນ​ປະຕິບັດ​ຕາມ​ມາດ​ຕະການ​ປ້ອງ​ກັນ ​ແລະ ​ເຝົ້າລະວັງ​ພະຍາດ​ຕ່າງໆ ​ແລະ ຄິດ​ຮອດ​ຜູ້​ອື່ນ​ນຳ” ນາງ ຊາ​ມາ ກ່າວ​.

ຫລັງ​ຈາກ​ຕິດ​ເຊື້ອພະຍາດ​ໂຄ​ວິດ-19 ນາງ ຊາ​ມາ ​ແລະ ​ແມ່​ຂອງ​ນາງ​ເຂົ້າຮັບ​ການ​ປິ່ນປົວ​ຢູ່​ໂຮງໝໍ​ໃນ​ເມືອງ​ເລ​ສ​ເຕີ ພ້ອມ​ກັນ​ໃນ​ເດືອນ​ຕຸລາ, ຈາກ​ນັ້ນ ນາງ ຣິ​ໂກ ​ໄດ້​ເສຍ​ຊີວິດ​ໃນ​ວັນ​ທີ 1 ພະຈິກ​ຜ່ານ​ມາ ​ໂດຍ​ນາງ ຊາ​ມາ ບໍ່​ສາມາດ​ໄປ​ຮ່ວມ​ງານ​ສົບ​ຂອງ​ແມ່​ໄດ້ ​ແລະ ຕ້ອງ​ເບິ່ງ​ການຖ່າຍ​ທອດ​ສົດຢູ່​ໂຮງໝໍ.

“​ແມ່​ຮູ້​ດີ​ວ່າ​ຈະ​ເກີດ​ຫຍັງ​ຂຶ້ນ ​ແລະ ​ແມ່​ຮູ້​ຕົວ​ວ່າ​ທ່ານ​ຈະ​ບໍ່​ເຊົາ​ຈາກ​ການ​ຕິດ​ເຊື້ອຄັ້ງນີ້ ​ແລະ ທ່ານ​ໄດ້​ຮັບ​ການ​ປິ່ນປົວ​ມາ​ພໍ​ແລ້ວ” ນາງ ຊາ​ມາ ​ເລົ່າ​ໃນ​ຂະນະ​ທີ່​ຕົນ​ເອງ​ຍັງ​ຕ້ອງ​ຮັບ​ການ​ປິ່ນປົວ​ດ້ວຍ​ອົກ​ຊີ ​ເພາະ​ປອດ​ທັງ​ສອງ​ເບື້ອງຂອງ​ນາງ​ໄດ້​ຮັບ​ຄວາມ​ເສຍ​ຫາຍ​ຈາກ​ເຊື້ອ​ໄວຣັສ​ໂຄ​ໂຣນາສາ​ຍພັນ​ໃໝ່.

ກ່ຽວກັບ admin

ກວດສອບຍັງ

ເຈົ້າໜ້າທີ່ ຍຶ ດ ຢ າ ບ້ າ ໄດ້ ຈໍານວນ 55 ເປົາ, ເທົ່າກັບ 2.737 ມັດ ຫຼື 5.474.000ເມັດ

ວັນທີ 15 ມັງກອນ 2021 ເວລາປະມານ 18 : 30 ນາທີ ເຈົ້າໜ້າທີ່ ປກສ ເມືອງ ຕົ້ນເຜິ້ງ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຈະມີຂະບວນການຂົນສົ່ງຢາເສບຕິດຈາກເມືອງ …

Leave a Reply

Your email address will not be published. Required fields are marked *