ຂ່າວດ່ວນ

ລາວທ່ຽວລາວ​ ຊ່ວຍຊຸກຍູ້ການທ່ອງທ່ຽວພາຍໃນປະເທດ

ພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (ໂຄວິດ-19) ໄດ້ສົ່ງຜົນກະທົບຕໍ່ອຸດສາຫະກໍາທ່ອງທ່ຽວທົ່ວໂລກເເບບທີ່ບໍ່ເຄີຍມີມາກ່ອນ ເປັນເຫດໃຫ້ຕ້ອງຈຳກັດການເດີນທາງລະຫວ່າງປະເທດ.ຈົນເຮັດໃຫ້ ສປປ ລາວ ແລະ ອີກຫລາຍປະເທດທີ່ອາໄສການທ່ອງທ່ຽວໃນການສ້າງລາຍໄດ້ໃຫ້ເເກ່ປະເທດ ຕ້ອງໄດ້ມີການປັບປ່ຽນກົນໄກໃນໄລຍະນີ້.

ອີງຕາມບົດລາຍງານ ຜົນກະທົບຂອງໂຄວິດ-19 ຕໍ່ວິສາຫະກິດທ່ອງທ່ຽວໃນ ສປປ ລາວ ຈາກທະນາຄານພັດທະນາອາຊີ ຫລື Asian Development Bank (ADB) ໃນເດືອນມິຖຸນາ 2020 ລະບຸວ່າ ການທ່ອງທ່ຽວສາກົນເປັນອຸດສາຫະກຳທີ່ຫາລາຍໄດ້ເຂົ້າສູ່ ສປປ ລາວ​ ໄດ້ຫລາຍເປັນອັນດັບທີ 3 ຊຶ່ງ ສາມາດສ້າງລາຍຮັບໄດ້ເຖິງ 934 ລ້ານໂດລາສາຫະລັດ, ຮອງຈາກການສົ່ງອອກເເຮ່ທາດ ເເລະ ການສົ່ງອອກໄຟຟ້າ.​

ໃນຂະນະທີ່ ສປປ ລາວ ບໍ່ມີຜູ້ຕິດເຊື້ອມາເເຕ່ວັນທີ 11 ກັນຍາ 2020 ຊຶ່ງກໍລະນີຫລ້າສຸດ ແມ່ນກໍລະນີເຂົ້າມາຈາກຕ່າງປະເທດ, ຍ້ອນການຄວບຄຸມມາດຕະການ ການປ້ອງກັນພະຍາດໂຄວິດ-19 ຢ່າງເຄັ່ງຄັດ ເພື່ອບໍ່ໃຫ້ມີການລະບາດຮອບໃໝ່ພາຍໃນປະເທດ ເຮັດໃຫ້ສາມາດເປີດການໄປມາຫາສູ່ເຊິ່ງກັນແລະກັນພາຍໃນປະເທດໄດ້.

ດັ່ງນັ້ນ, ການສົ່ງເສີມການທ່ອງທ່ຽວພາຍໃນປະເທດ ຈຶ່ງເປັນກະເເຈສຳຄັນໃນການຂັບເຄື່ອນເສດຖະກິດອີກເທື່ອໜຶ່ງ. ຫລ້າສຸດ, ລັດຖະບານໄດ້ມີການເປີດໂຄງການ “ລາວທ່ຽວລາວ”​ ເພື່ອສົ່ງເສີມການທ່ອງທ່ຽວພາຍໃນ ທັງເປັນການກະຕຸ້ນເສດຖະກິດອີກດ້ວຍ.

“ພວກເຮົາມີເເຜນຢາກສົ່ງເສີມໂຄງການ “ລາວທ່ຽວລາວ” ບໍ່ພຽງແຕ່ພາຍໃນປະເທດເທົ່ານັ້ນ, ເເຕ່ຍັງເປັນການເຜີຍແຜ່ໃຫ້ຕ່າງປະເທດຮູ້ນໍາອີກດ້ວຍວ່າ ພວກເຮົາພ້ອມທີ່ຈະມີການສົ່ງເສີມການທ່ອງທ່ຽວພາຍໃນເເລ້ວ, ເຖິງວ່າກຸ່ມນັກທ່ອງທ່ຽວຕ່າງປະເທດຈະຍັງບໍ່ສາມາດເຂົ້າມາທ່ຽວລາວໄດ້ກໍຕາມ,” ທ່ານ ບຸນລັບ ດວງພູມີ ຮອງຫົວໜ້າກົມ ໂຄສະນາການທ່ອງທ່ຽວ, ກະຊວງ ຖະເເຫລງຂ່າວ, ວັດທະນະທຳ ເເລະ ທ່ອງທ່ຽວກ່າວເມື່ອບໍ່ດົນນີ້.

ສຳລັບ ໂຄງການ “ລາວທ່ຽວລາວ” ແມ່ນສ້າງຂຶ້ນໂດຍສະພາການຄ້າ ເເລະ ອຸດສາຫະກຳ ເເລະ ໄດ້ຮັບການສົ່ງເສີມຈາກພາກສ່ວນລັດຖະບານ, ໂຄງການດັ່ງກ່າວເປັນບຸລິມະສິດຂອງທັງພາກລັດ ເເລະ ເອກະຊົນ ໂດຍມີການໃຊ້ສື່ສັງຄົມອອນລາຍຕ່າງໆ ເປັນຕົ້ນເເມ່ນ ເຟສບຸກ(Facebook) ເເລະ ອິນສະຕຣາແກຣມ (Instagram)​ ເປັນສື່ກາງໃນການສະເໜີຂໍ້ມູນໃຫ້ຄົນລາວຮຽນຮູ້ ກ່ຽວກັບ ຜູ້ປະກອບການທຸລະກິດທ້ອງຖິ່ນ ເເລະ ແຫລ່ງທ່ອງທ່ຽວຕ່າງໆ ທີ່ໜ້າສົນໃຈ,

ພ້ອມກັບຊ່ວຍເຫລືອທຸລະກິດທ້ອງຖິ່ນໃນຊຸມຊົນອີກດ້ວຍ. ມາຮອດປັດຈຸບັນ, ໂຄງການລາວທ່ຽວລາວໄດ້ມີການ ໂຄສະນາ ຊ່ວຍຫລາຍກວ່າ 20 ຫົວໜ່ວຍທຸລະກິດ ທ່ອງທ່ຽວ ທົ່ວປະເທດ ຊຶ່ງໃນນັ້ນປະກອບມີ ບັນດາໂຮງເເຮມຂະໜາດນ້ອຍ, ເຮືອນພັກ, ຮ້ານອາຫານ ເເລະ ສະຖານທີ່ທ່ອງທ່ຽວ

“ເຟສບຸກ​ ຖືວ່າເປັນປັດໄຈທີ່ສຳຄັນທີ່ສຸດໃນການສົ່ງເສີມໂຄງການ ລາວທ່ຽວລາວ ຊຶ່ງເປັນຊ່ອງທາງຫລັກໃນການດຳເນີນການໂຄງການດັ່ງກ່າວ” ທ່ານ ອິນທີ ເດືອນສະຫວັນ ຄະນະບໍລິຫານສະມາຊິກສະພາການຄ້າ ເເລະ ອຸດສາຫະກຳ ແລະທັງເປັນຜູ້ນຳພາໂຄງການນີ້ກ່າວ. ພ້ອມທັງຍົກໃຫ້ເຫັນຕື່ມວ່າ: “ໃນໄລຍະນີ້, ສື່ສັງຄົມອອນລາຍ ເປັນປັດໄຈສຳຄັນຕໍ່ທຸລະກິດ ທຸກຮູບເເບບ ເເລະ ທຸກຂະໜາດ ເພາະວ່າສາມາດເຂົ້າເຖິງລູກຄ້າກຸ່ມໃຫຍ່ໄດ້”

ພ້ອມນີ້,​ທ່ານ ນາງ ເພັດມະນີສອນ ເເສງສຸລາດ ຫລືນຸດ ເຈົ້າຂອງທຸລະກິດ Bio Bamboo Luangprabang ທີ່ ແຂວງຫລວງພະບາງ ຊຶ່ງເປັນໜຶ່່ງໃນທຸລະກິດທີ່ໄດ້ຮັບການສະໜັບສະໜູນຈາກໂຄງການນີ້ ໃຫ້ຄວາມເຫັນວ່າ ທາງຮ້ານໄດ້ຮັບຜົນກະທົບຢ່າງໜັກໃນໄລຍະເວລາ 2 ເດືອນທຳອິດ ແຕ່ກໍ່ໄດ້ພະຍາຍາມໃຊ້ຊ່ອງທາງການສື່ສານທີ່ສະດວກ ໂດຍສະເພາະເເມ່ນ​ ເຟສບຸກ​ ຊຶ່ງໄດ້ຮັບຜົນຕອບຮັບຈາກການໂຄສະນາດີຫລາຍ ໂດຍມີແຂກກັບຄືນມາໃຊ້ບໍລິການຮ້ານ ເເລະ ໄດ້ຮັບການສັ່ງຊື້ຂອງທີ່ລະລຶກຈາກຮ້ານ.

“ພວກເຮົາໄດ້ມີການສ້າງເນື້ອໃນທີ່ຕໍ່ເນື່ອງ ເເລະ ເຮັດໃຫ້ເເຂກທຸກຄົນຮູ້ວ່າຮ້ານເຮົາເປີດຄືນເເລ້ວ​ ຊຶ່ງໃນເພສ, ພວກເຮົາຈະມີການໂຄສະນາທີ່ຫລາກຫລາຍ ລວມມີ ຮ້ານອາຫານ, ສະເເດງຮູບ ເເລະ ລາຍການອາຫານ, ເຄື່ອງທີ່ລະລຶກ ທີ່ເຮັດມາຈາກ ໄມ້ໄຜ່ທີ່ເປັນເອກະລັກຂອງຮ້ານເຮົາ ໂດຍຜ່ານ Facebook Shops. ເຮັດໃຫ້ທຸກຄົນໃນຊຸມຊົນຮູ້ສຶກພູມໃຈໃນທຸລະກິດເຮົາ ເເລະ ຫວັງວ່າຈະມີນັກທ່ອງທ່ຽວພາຍໃນເພີ່ມ.”

ທ່ານ ນາງ ເພັດມະນີສອນ ກ່າວ.

ກ່ຽວກັບ admin

ກວດສອບຍັງ

ສປປ ລາວ ຈະສູນເສຍລາຍຮັບຈາກການທ່ອງທ່ຽວ ມູນຄ່າ 500 ລ້ານໂດລ້າສະຫະລັດ

ທະນາຄານໂລກ ລາຍງານວ່າ ຖ້າສະພາບການໂຄວິດ ໃນທົ່ວໂລກ ສືບຕໍ່ແກ່ຍາວອອກໄປ ຈົນຮອດ ທ້າຍປີ 2020, ສປປ ລາວ ຈະສູນເສຍລາຍຮັບຈາກການທ່ອງທ່ຽວ ມູນຄ່າ 500 ລ້ານໂດລ້າສະຫະລັດ ຫຼືປະມານ …

Leave a Reply

Your email address will not be published. Required fields are marked *